ម៉ាឡេស៊ី​ ទប់​តម្លៃ​សាំង​មិន​ឲ្យ​ឡើង​សូម្បី​មួយ​បៀក

ត្បិត​ថា​​តម្លៃ​ប្រេង​ឆៅ​មាន​ការ​កើន​ឡើង​នៅ​មួយ​រយៈ​ចុង​ក្រោយ​នេះ​ក៏​ពិត​មែន​ ប៉ុន្តែ​រដ្ឋាភិបាល​ម៉ាឡេស៊ី​អាច​ទប់​ទល់​មិន​ឲ្យ​តម្លៃ​ប្រេង​ឥន្ធនៈ​ក្នុង​ប្រទេស​នេះ​ កើន​ឡើង​សូម្បី​បន្តិច។



យោង​តាម​ការ​លើក​ឡើង​របស់​លោក​ Datuk Seri Johari Abdul Ghani មន្ត្រី​ផ្នែក​ហិរញ្ញវត្ថុ​​ឲ្យ​ដឹង​ថា​ការ​សម្រេច​ចិត្ត​រក្សា​តម្លៃ​ប្រេង​ឥន្ធនៈ​នេះ​ធ្វើ​ឡើង​ដោយ​នាយក​រដ្ឋ​មន្ត្រី​នៃ​ប្រទេស​នេះ​ផ្ទាល់ ដើម្បី​សម្រួល​ដល់​ពលរដ្ឋ​ដែល​មាន​​ប្រាក់​ចំណូល​តិច។



ការ​សម្រេច​ចិត្ត​រក្សា​តម្លៃ​ប្រេង​ឥន្ធនៈ​នេះ​មិន​ឋិតថេរ​រហូត​នោះ​ទេ ដោយ​បច្ចុប្បន្ន​រដ្ឋាភិបាល​ម៉ាឡេស៊ី​កំពុង​ស្វែង​រក​ដំណោះ​ស្រាយ​លើ​បញ្ហា​នៃ​ការ​កើន​ឡើង​តម្លៃ​ប្រេង​ឆៅ​នេះ​ ​ហើយ​តម្លៃ​ប្រេង​ឥន្ធនៈ​អាច​នឹង​មាន​ការ​ប្រែ​ប្រួល​នៅ​ថ្ងៃ​ខាង​មុខ។



គួរ​ដឹង​ថា​គិត​ចាប់​តាំង​ពី​ដើម​ខែ​មេសា​មក​ តម្លៃ​ប្រេង​ឥន្ធនៈ​នៅ​ម៉ាឡេស៊ី​មិន​មាន​ការ​ប្រែ​ប្រួល​នោះ​ទេ ដោយ​ប្រេង​សាំង​​​ប្រភេទ​ RON 95 នៅ​តែ​មាន​តម្លៃ ២,២ រីងហ្គីត (ប្រមាណ​ ២ ២២៥ រៀល)​ , ប្រេង​សាំង​ RON 97 មាន​តម្លៃ ២,៤៧ រីង​ហ្គីត (ប្រមាណ​ ២ ៤៩៨ រៀល), ប្រេង​​ម៉ាស៊ូត Euro 2M មាន​តម្លៃ ២,១៨ រីងហ្គីត (ប្រមាណ​ ២ ២០៥ រៀល)​ និង ប្រេង​ម៉ាស៊ូត​ Euro 5 មាន​តម្លៃ​ ២,២៨ រីងហ្គីត (ប្រមាណ​ ២ ៣០៦ រៀល)៕