អាចារ្យធំ ប្រឈមជាប់ពន្ធនាគារព្រៃសរ ពី១ឆ្នាំដល់៣ឆ្នាំ និងពិន័យជាប្រាក់ពី២ទៅ៦លានរៀល
លោក ស្រាន់ សុខរុំ ហៅអាចារ្យធំ ប្រឈមជាប់ពន្ធនាគារព្រៃសរពី១ឆ្នាំទៅ៣ឆ្នាំ និងត្រូវពិន័យជាសាច់ប្រាក់ចាប់ពី២លានរៀលដល់៦លានរៀល ពាក់ព័ន្ធនឹងបទញុះញង់ឲ្យមានការរើសអើង តាមបណ្តឹងរបស់លោក ឆឺយ ប៊ុនធឿន តំណាងឲ្យគណបក្សសម្ព័ន្ធដើម្បីប្រជាធិបតេយ្យរបស់លោកខឹម វាសនា ដែលបានដាក់ពាក្យបណ្តឹងទៅសាលាដំបូងរាជធានីភ្នំពេញកាលពីខែកក្កដាកន្លងទៅនេះ។
យោងទៅតាមមាត្រា៤៩៦ បានបញ្ជាក់ថា អំពើញុះញង់ដោយផ្ទាល់តាមមធ្យោបាយណាមួយ ដែលមានចែងក្នុងមាត្រា ៤៩៤ (លក្ខខណ្ឌអត្ថិភាពនៃការញុះញង់) នៃក្រមនេះ ឲ្យប្រព្រឹត្តការរើសអើង ការគុំកួន ឬហិង្សាចំពោះបុគ្គលណាម្នាក់ ឬក្រុមណាមួយ ដោយមូលហេតុនេះ ជាសមាជិក ឬមិនមែនជាសមាជិកនៃជាតិពន្ធុ ក្រុមជាតិ ពូជសាសន៍ ឬនៃសាសនាណាមួយជាកំណត់នៅះ ត្រូវផ្តន្នាទោសដាក់ពន្ធនាគារពី ១ឆ្នាំទៅ៣ឆ្នាំ និងពិន័យជាប្រាក់ពី ២លានរៀល ដល់៦លានរៀល បើទោះការញុះញង់នេះគ្មានប្រសិទ្ធភាពក៏ដោយ។
លោក ខឹម វាសនា មេបក្សសម្ព័ន្ធ បានប្តឹងលោក ស្រាន់ សុខរុំ ហៅអាចារ្យធំចំនួន៣ករណី គឺបទបរិហារកេរ្តិ៍ជាសាធារណៈ បទជេរប្រមាថជាសាធារណៈ និងបទញុះញង់ឲ្យមានការរើសអើង ដែលបានប្រព្រឹត្តនៅរាជធានីភ្នំពេញ កាលពីថ្ងៃទី១១មិថុនា ឆ្នាំ២០១៧កន្លងមកនេះ។
សូមរំលឹកផងដែលថា នៅថ្ងៃទី១៨សីហាកន្លងទៅថ្មីៗនេះលោក ស្រាន់ សុខរុំ ហៅអាចារ្យធំ ក៏បានចូលទៅបំភ្លឺតាមដីការកោះរបស់សាលាដំបូងរាជធានីភ្នំពេញ តាមសំណើរនៃពាក្យបណ្តឹងរបស់ លោក ឆឺយ ប៊ុនធឿន រួចរាល់ហើយ៕
No comments