ឡានកូរ៉េដំឡើងនៅខេត្តស្វាយរៀង ចង់ដឹងអត់លក់តម្លៃប៉ុន្មានខ្លះ?

ក្រុមហ៊ុន DAEHAN AUTO (CAMBODIA) CO.,LTD ដែលមានទីតាំងស្ថិតក្នុងតំបន់សេដ្ឋកិច្ចពិសេស អ៊ិនធើវៀ អូតូម៉ូបាល អ៊ិនដាសស្រ្ទី ខមផ្លេកស៍ ស្ថិតនៅភូមិព្រៃផ្ដៅ សង្កាត់ច្រកម្ទេស ខេត្តស្វាយរៀង ទើបតែបានបើកសម្ពោធជាផ្លូវការ កាលពីថ្ងៃទី ០៩ ខែ ឧសភា ឆ្នាំ ២០១៨ កន្លងទៅនេះ។

វាគឺក្រុមហ៊ុនធំទី ២ ដែលទទួលបានការអនុញ្ញាត ពីរាជរដ្ឋាភិបាលកម្ពុជា ឲ្យវិនិយោគបង្កើតរោងចក្រដំឡើងរថយន្ត។ ក្រុមហ៊ុននេះត្រូវបានគេដឹងថា មានដំឡើងរថយន្តប្រភេទដឹកជញ្ជូន ម៉ាក Daehan និងរថយន្តប្រភេទទេសចរណ៍ដឹកអ្នកដំណើរ ម៉ាក SsangYong ផងដែរ។

រថយន្តម៉ាក Daehan សម្រាប់ដឹកជញ្ជូន មានតម្លៃខ្ទង់ ២ ម៉ឺនដុល្លារ ខណៈរថយន្តម៉ាក SsangYong មានជាច្រើនម៉ូដែល ដូចជា៖

រថយន្តម៉ាក SsangYong Rexton មានតម្លៃខ្ទង់ ៥ ម៉ឺនដុល្លារ

រថយន្តម៉ាក SsangYong Stavic មានតម្លៃខ្ទង់ ៣ ម៉ឺនដុល្លារ

រថយន្តម៉ាក SsangYong Tivoli មានតម្លៃខ្ទង់ ៣ ម៉ឺនដុល្លារ

រថយន្តម៉ាក SsangYong Tivoli Air មានតម្លៃខ្ទង់ ៤ ម៉ឺនដុល្លារ

សូមបញ្ជាក់ថា បច្ចុប្បន្ននេះក្រុមហ៊ុនមានផែនការផលិតសម្រាប់លក់តែក្នុងស្រុកប៉ុណ្ណោះ ស្របពេលដែលរាជរដ្ឋាភិបាលកំពុងសិក្សាអំពីលទ្ធភាពនៃការបើកធនាគារ ដែលផ្ដល់ប្រាក់កម្ចីអត្រាការប្រាក់ទាប សម្រាប់ទិញរថយន្តដំឡើងនៅកម្ពុជា៕